
第一世噶玛巴教言集1KM7རྗེ་དུས་གསུམ་མཁྱེན་པའི་ཞལ་ཆེམས་བཞུགས་སོ། །
1-2-105a
༄༅། །རྗེ་དུས་གསུམ་མཁྱེན་པའི་ཞལ་ཆེམས་བཞུགས་སོ། །
༄༅། །རྗེ་དུས་གསུམ་མཁྱེན་པའི་ཞལ་ཆེམས་བཞུགས་སོ། །ཐམས་ཅད་མཁྱེན་པ་ལ་ཕྱག་འཚལ་ལོ། །ཆོས་རྗེ་དུས་གསུམ་མཁྱེན་པ་ཞེས་མཚན་ཉི་ཟླ་ལྟར་གྲགས་པ་དེ་ཉིད་སྐུ་ཡལ་བའི་དུས་ནི། གླང་ལོའི་སྟག་ཟླའི་ཚེས་གཅིག་གི་ཉིན་པར། དགེ་བཤེས་རྩང་པོ་བ། དཔོན་འདུལ་དང་། དཔོན་གྲགས་སེང་དང་། གྲགས་རིན་དང་། དཀོན་མཆོག་རྒྱལ་མཚན་དང་། ན་འུན་པ་ལ་སོགས་པ་བགྲེས་པོ་ཉུང་དུ་བསགས་ནས་ཞལ་ཆེམས་གསུངས་པ་ནི། ང་ལ་བདག་ཏུ་བཟུང་བ་ནི་གོས་ལུས་གང་དང་། བཀའ་སྩལ་གྱི་ཕྱེ་འཐག་པའི་རང་ཐག་ལས་མེད་གཞན་ཡོ་བྱད་ཐམས་ཅད་དགེ་འདུན་དབང་སྟེ། གསེར་སྲང་ཉིས་བརྒྱ་ཉི་ཤུ་རྩ་གཉིས་དང་༑ དངུལ་དང་། གཡུ་དང་། དར་ཟབ། མཛོ་རྟ། ཐབ་ཆ་མང་པོ་ཡོད་པ་རྣམས་ཁྱེད་མི་ལྔ་པོས་བདག་པོ་གྱིས་ལ་ནས་སུ་བསྒྲུབས་ལ་གྲྭ་པ་ལ་ཁྱེ། ངའི་ཤུལ་དུ་ལོ་གཅིག་གཉིས་སྡོད་ཅིག་གསུང་། དཔོན་གྲགས་སེང་གིས། སྡོད་པ་ཅི་ཙམ་འོང་ངམ་ཞུས་པས། སྐུ་ཡར་བསྲངས། སྤྱན་ཧུར་གྱིས་མཛད་ནས། ཐ་མ་ཡང་དབྱར་དགུན་གཅིག་གཉིས་སྡོད་པ་འོང་བ་མིན་ནམ་གསུང་། ཡང་། གཞོན་ནུ་ཁྱོད་ལོ་གཅིག་གཉིས་འདིར་སྡོད་ལ། ངའི་ཐུགས་དམ་སྐུ་གསུང་ཐུགས་ཀྱི་རྟེན་འདི་རྣམས་ལ་ཡི་གེ་འབྲུ་གཅིག་ཀྱང་མ་འཐོར་བ་གྱིས། ངས་ཀྱང་ཆོས་སྐྱོང་ལ་བཀའ་བསྒོ་ཞིང་གཏད་པ་ཡིན་གསུང་། དེ་གོང་ནས་ཟླ་བ་
1-2-105b
གསུམ་དུ་ནམ་མཁའ་ལ་འཇའ་ཚོན་དང་། ས་གཡོས་དང་། འུར་ཐུག་གི་སྒྲ་ལ་སོགས་པ་ལྟས་ཆེན་པོ་རྒྱུན་མ་ཆད་པ་བྱུང་། ཁྱད་པར་ཚེས་གྲངས་གཉིས་ནས་གསུམ་དུ་འགྲོ་བའི་ནུབ་མོ་ས་གཡོས་བར་མ་ཆད་པ་དང་། ཡང་དགོན་གྱི་སྟེང་དུ་འཇའི་གདུགས་ཕུབ་པ་དང་། ལ་ལའི་སྣང་བ་ལ་མཁའ་འགྲོ་མ་མང་པོ་འཚོགས་པ་དང་། ཌཱ་མ་རུའི་སྒྲ་གྲགས་པ་ལ་སོགས་པ་བྱུང་། ཚེས་གསུམ་གྱི་དྲོ་ཐོན་པའི་རྗེས་ལ། གྲྭ་པ་རྣམས་ལ་ཞལ་བསྟན་ནས། ད་ཕྱིར་བཞུགས་ཅིག་གསུངས། དེ་ནས་སྐུ་དྲང་པོར་བསྲངས་ཏེ་སྐྱིལ་དཀྲུངས་མཛད་ནས་སྤྱན་ནམ་མཁའ་ལ་ཡུན་རིང་པོ་གཟིགས་ནས། སླར་དབུ་ན་བཟས་གཡོགས་ནས་ཐུགས་དམ་ལ་བཞུགས་པ་དང་། ཚེས་གསུམ་གྱི་རྒོངས་མོ་ཉི་མ་དང་ཟླ་བ་དང་འགྲོགས་ནས་འཇིག་རྟེན་གྱི་ཁམས་གཞན་དག་ཏུ་འགྲོ་དོན་ལ་དགུང་ལོ་བརྒྱད་བཅུ་རྩ་བཞི་ལ་གཤེགས་སོ། །དེ་ནས་ཚེས་བཅུ་ལ་གདུང་བཞུ་བས། དེར་འཚོགས་པའི་སྣང་བ་ལ། ཉི་མ་སྔར་བས་ཉིས་འགྱུར་གྱིས་རིང་བ་དང་། བཅུ་གསུམ་དང་བདུན་བརྒྱད་སྣང་བ་དང་། འདུ་ཞིང་དགྱེས་པ་དང་། འོད་ཟེར་རྨ་བྱའི་གདུགས་ལྟ་བུར་མཐོང་བ་དང་། དཔའ་བོ་དང་རྣལ་འབྱོར་མ་རུས་པའི་རྒྱན་ཅན་མང་པོ་དང་། མེ་ཏོག་གི་ཆར་དང་། སྤུར་གྱི་སྟེང་ན་འཇའི་གདུགས་བརྩེགས་པ་དང་། དུད་པ་འཇའ་ཚོན་བཞིན་དུ་གྱུར་པའི་ནང་ན་བླ་མ་ཉིད་བཞུགས་
1-2-106a
༄༅། །པ་དང་། དུད་པ་ལ་བྱ་རྣམས་བསྐོར་བ་བྱེད་པ་དང་། མེ་སྒྲ་ལ་སྒྲ་སྙན་མང་པོ་གྲགས་པ་དང་། རི་དགས་རྣམས་འདུས་ནས་གུས་པ་བྱེད་པ་ལ་སོགས་པ་མཐོང་སྣང་མང་པོ་བྱུང་། དགེ་སྦྱོར་མེད་པ་ལ་སྐྱེས་པ་དང་། ཡོད་པ་རྣམས་ལ་བོགས་ཐོན་པ་དང་། དེ་ནས་སྟོང་ཉིད་སྙིང་རྗེ་དབྱེར་མེད་ཅིང་། ཐེག་པ་སྣ་ཚོགས་ཀྱི་ཆོས་སྟོན་པའི་ཐུགས་དང་། ལྗགས་དང་། བྱང་ཆུབ་ཀྱི་སེམས་འབྱོངས་པའི་རིང་ཀླུ བསྲེལ་དང་། བསྐྱེད་རིམ་ལ་བརྟན་པ་ཐོབ་པས་ལྷའི་སྐུ་མང་པོ་གཞན་དོན་ལ་བྱོན་ནོ། །དེ་ལྟར་ལོ་གསར་ལ་སྐུ་གཤེགས་པའི་དེའི་དགུན་གྲང་བས་ཕལ་ཆེར་གྱེས་ནས། དཔྱིད་ཀ་ཤུལ་ན་བཞུགས་པའི་དགེ་བཤེས་རྩང་པོ་བ་དང་། ཤེར་འབྱུང་དང་། དཀོན་སེང་དང་། དཔོན་རིན་ཆེན་སེང་གེ་དང་། ཕྱག་དཔོན་གྲགས་སེང་ལ་སོགས་པའི་མི་ཆེན་གདན་སར་བསྐོས་པ་དེ་རྣམས་འཚོགས་ནས་གྲོས་བྱས་ཏེ། མཚུར་ཕུ་འདི་ཟིན་པ་དང་བགྲོད་པ་དཀའ་ལ། གནས་གཞི་ཅ་ར་ནི་ཡུལ་གྱི་སྙིང་པོ། སའི་མདུད་པ་གདན་ས་བྱེད་པའི་འོས་སུ་འདུག་པས་ཞལ་འཆམ་མོ། །དེར་བསྒོམ་དར་ལ་གཉེར་པ་ཞུས་ནས་ཅེ་རར་འཚོགས་ནས། གདུང་རྟེན་མཁན་པོ་བཟོ་ཆེན་རྟ་འུ་རིན་ཆེན་སྒང་ནས་བྱོན། དགེ་བཤེས་སྟོན་རྒྱལ་གྱི་ས་འབུམ་མཁན་པོ་དགེ་བཤེས་གཉལ་སྟེ་སྤྱན་དྲངས་ནས། བཟོ་ཐམས་ཅད་ལག་ལེན་དུ་བྱས། དེ་ནས་དགེ་བཤེས་
1-2-106b
གཡོར་པོས་མཆོད་ཁང་དབུ་རྩེའི་རྨང་འདིངས་པའི་དཔོན་མཛད། དེའི་ཚེ་སློབ་དཔོན་ཤེར་རིན་གྱི་ཞལ་ནས། འོ་ཁྱེད་གཉིས་ཉོན་གཅིག །མཚུར་ཕུའི་དགོན་པ་འདི་རིན་པོ་ཆེས་སྐམ་པོ་གངས་ར་ནས་ཐུགས་དགོངས་གཏད་ནས་འདིར་བྱོན། ཚོགས་པ་བསྡུས། ཞལ་ཆེམས་སུ་ཕོག །སྐུ་ཡང་འདིར་གཤེགས། གདུང་ཡང་འདིར་བཞུས། ཐུགས་དམ་མང་པོ་ཡང་ཞལ་གཟིགས་ཤིང་། དབང་དང་རབ་གནས་མང་པོ་ཡང་མཛད་ནས། ས་གཞི་བྱིན་གྱིས་བརླབས་པའི་གནས་འདི་བཞག་ནས་གར་འགྲོ་གསུངས་ནས། དཔོན་སློབ་གསུམ་གྱིས་དམ་བཅས་ཏེ། རིན་པོ་ཆེའི་སྐུ་ཚབ་ཀྱི་རྒྱུ་ལ། གདུང་བཞུ་བ་སྤྱན་དྲངས་པའི་འོ་མ་དང་༑ དྲི་བཟང་ལ་སོགས་པ་བྱས་ཏེ། ནང་དུ་སངས་རྒྱས་ཀྱི་རིང་བསྲེལ་དང་། བཀའ་རྒྱུད་གོང་མ་རྣམས་ཀྱི་གདུང་དང་། ཆོས་རྗེའི་གདུང་རིང་བསྲེལ། དབུ་སྐྲ། ཕྱག་སེན། ཞབས་སེན། ན་བཟའ་ལ་སོགས་པ་རྣམས་བཞུགས་ཏེ། ལེགས་པར་ཚར་བ་དང་། མོས་གུས་ཀྱི་རྟེན་དུ་སྔར་གྱི་གཟིམས་སྐྱོར་དེར་བཞུགས་སོ། །ཡང་གདུང་ཐལ་ལ་སོགས་པ་འོ་མི་རྒྱལ་བའི་ཆེད་དུ་གདུང་རྟེན་བཞེངས་པར་འདོད་པ་ལ། དཔོན་སློབ་གཉིས་གྲོས་བྱས་ཏེ། འབུམ་པའི་ལུགས་ནི་ཤིན་ཏུ་མང་ཡང་། སའི་མཆོད་རྟེན་དཔལ་ལྡན་འབྲས་སྤུངས་འདྲ་བ་གཅིག་བཞེངས་དགོས་པ་ཡིན། སྤྱིར་འཛམ་བུ་གླིང་ན་ངོ་མཚར་ཆེ་བའི་སྐུ་གསུང་
1-2-107a
༄༅། །ཐུགས་ཀྱི་རྟེན་ནི། རྒྱ་གར་ལྷོ་ཕྱོགས་ན་ཆོས་ཀྱི་སྐུའི་རྟེན། དཔལ་ལྡན་འབྲས་སྤུངས་རེག་པ་མེད་པའི་གདུགས་ཅན། ལྷ་ཆེན་པོ་བཞིས་ཡོན་བདག་བྱས། ལྷ་བཟོ་བི་ཤྭ་ཀར་མས་མཛད་པ་དང་། ཕྱིའི་རྒྱ་མཚོ་ན་ལོངས་སྐུའི་རྟེན་དཔལ་རྣམ་པར་སྣང་མཛད་གངས་ཆེན་མཚོ། རྒྱུ་རིན་པོ་ཆེ་སྣ་ལྔ་ལས་བྱས་པ། སྤྱི་བོ་ན་ཆུ་ཤེལ་ཆེན་པོ་ཡོད་པ་ཅིག་ར་ཧུ་ལས་ཡོན་བདག་བྱས་ཏེ། བི་ཤྭ་ཀར་མས་བཟོ་བོ་བྱས་པ་བཞུགས། རྡོ་རྗེ་གདན་ན་སྤྲུལ་སྐུ་རྟེན། བྱང་ཆུབ་ཆེན་པོ་ཙན་དན་གོར་ཤི་ཤའི་དྷེ་གུ་ལས་བྱས་པ། སངས་རྒྱས་ཀྱི་དགུང་ལོ་སུམ་བཅུ་སོ་བརྒྱད་དང་མཉམ་པ། སྤྱན་རིན་པོ་ཆེས་བྱས་པ། དེ་བྲམ་ཟེ་སྤུན་གསུམ་གྱི་ཐ་ཆུང་གིས་ཡོན་བདག་བྱས་ཏེ། བཟོ་བོ་བི་ཤྭ་ཀར་མས་མཛད་པ་བཞུགས་སོ། །དུས་ཕྱིས་མཆོད་རྟེན་འབྲས་སྤུངས་ཀྱི་དྲུང་ན། པཎྜི་ཏ་ཉི་མའི་སྙིང་པོ་བྱ་བ་བཞུགས་པས། རྒྱ་གར་ཤར་ཕྱོགས་ཀྱི་ལྷ་བཟོ་ཅིག་བོས་ནས། དེའི་གཟུགས་ཇི་ལྟ་བ་ལ་བུམ་པ་ལ་ལྷ་ཇི་ལྟར་ཡོད་པ་དང་། དེའི་མཐའ་མ་ན་སློབ་དཔོན་ཀླུ་སྒྲུབ་ཀྱི་རྣམ་ཐར་བཀོད་པ་རྣམས་ཇི་ལྟ་བར་ཐང་ཀ་ཆེན་མོ་གཅིག་ལ་བྲིས་ནས། བོད་དུ་པཎྜི་ཏ་དེས་ཁྱེར་ནས་འོངས་པས། དེས་སློབ་མ་སྟོན་པ་གཉིས་ལ་གནང་ནས། ད་ལྟ་དགེ་བཤེས་གླན་གྱིས་བཞེངས་པའི་གཙུག་ལག་ཁང་ན་བཞུགས་ཟེར་བ་ཐོས་ནས། དགེ་བཤེས་རྣམ་འབར་བའི་དཔོན་
1-2-107b
སྟོན་ལྷ་སར་འབྱོན་པ་དང་འགྲོགས་ནས། ཐང་ཀ་དེ་ལས་དཔེ་བླངས། ལྷ་ས་ཐང་མགོ་ནས་རྒྱ་གར་དུ་ལན་གཉིས་བྱོན་པའི་རྣམ་འབར་བའི་སློབ་མ་བལ་པོ་ལོ་ཙཱ་བ་ལ་དཀར་ཞལ་དང་མཆོད་རྟེན་གྱི་ཚད་བསླབས་ནས་འོངས། སྔར་རིན་པོ་ཆེའི་ཞལ་ནས། ཡང་དགོན་གྱི་རྒྱབ་འདིར་འབྲས་སྤུངས་ཀྱི་མཆོད་རྟེན་ཅིག་བཞེངས་ལ་བསྐོར་བ་བྱའོ་གསུང་བའི་ལུང་ཡོད་པས། དེར་གདུང་བཞུ་སར། མཆོད་རྟེན་བྱ་བའི་རིམ་པ་ལྔ་ལ་བརྟེན་ནས། ས་ཆོག་ལ་སོགས་པ་བྱས་སོ། །དེ་ཉིན་ཁ་བ་ཆེན་པོ་བབ་སྟེ་འཇའ་ཚོན་གདུགས་འདྲ་བས་ནམ་མཁའ་ཁེངས་པ་མཆོད་རྟེན་མ་ཚར་བར་དུ་བྱུང་། དེར་དགེ་བ་ལ་བར་དུ་གཅོད་པའི་མི་དང་མི་མ་ཡིན་པ་རྣམས་ལ་བྱང་ཆུབ་ཀྱི་སེམས་བསྒོམས། ཚིག་གི་མཚོན་བརྡེག་པ་ལ་བཟོད་པའི་གོ་གྱོན། སངས་རྒྱས་ཐམས་ཅད་ཀྱི་ངོ་བོ་བླ་མའི་ཐུགས་དགོངས་ཡོངས་སུ་རྫོགས་པར་བྱ་བའི་ཕྱིར་སེམས་བསྐྱེད་ནས། སློབ་དཔོན་ཤེར་རིན་གྱིས་ཚད་ཤིང་བཟུང་། ཁོ་བོས་རྩིག་བཟོ་བྱས་པས་ཞག་བཅུ་ལ་བྲེ་མན་ཆད་བཞེངས་ཟིན། རྒྱལ་བ་རྡོ་རྗེ་གྲགས་བོས་ནས་ཞལ་ལ་བཅོལ་བས་ཟླ་བ་ཕྱེད་ན་ལེགས་པར་ཚར་ཏེ། ལུགས་སུ་བླུག་ཅིང་འབུར་དུ་བཏོད་པ་ལྟར་ཞག་ཉི་ཤུ་རྩ་ལྔ་ན་ཟིན་པས། གང་གིས་མཐོང་བ་ཐམས་ཅད་ཀྱིས་ཤིན་ཏུ་ལེགས་སོ་ཞེས་ཟེར། དེའི་ནང་དུ་སངས་རྒྱས་ཀྱི་རིང་བསྲེལ་དང་། དེ་བཞིན་
1-2-108a
༄༅། །གཤེགས་པ་གླང་པོའི་གདུང་དང་། བྱང་ཆུབ་ཤིང་གི་ལོ་མ་དང་། འབྲས་བུ་དང་། གནས་ཆེན་པོ་བརྒྱད་ཀྱི་ས་དང་། ལི་ཡུལ་ནས་བྱོན་པའི་དཔལ་ཁ་སར་པ་ཎིའི་སྐུ་ཁྲུ་གང་པ་གཅིག་གིས་སྣ་དྲངས་པའི་ལུགས་མ་བཅུ་གཅིག་དང་། གླེགས་བམ་གཉིས་ལ་སོགས་པ་གསུང་གི་རྟེན་མང་པོ་དང་། རིན་པོ་ཆེའི་གདུང་། རིང་བསྲེལ། དབུ་སྐྲ། ཕྱག་ཞབས་ཀྱི་སེན་མོ། ན་བཟའ། བཞུགས་གདན། ཞབས་ས་དང་། བཀའ་རྒྱུད་གོང་མ་རྣམས་ཀྱི་གདུང་། དབུ་སྐྲ་ལ་སོགས་པ་དཔག་ཏུ་མེད་པ་བཞུགས། སྟེང་དུ་རྡོ་རྗེའི་འཁོར་ལོ་རིམ་པ་བཅུ་གསུམ་དང་། མགར་བ་མཁས་པ་ཁྲི་བརྟེན་གྱིས་བཟོ་བྱས་པའི་ཟངས་བ ཀྱིས་ཆར་བབས་བྱས། སློབ་མ་དད་པ་ཅན་མུ་ཙུ་ཨ་ཙོམས་ཀྱིས་བལ་ཡུལ་དུ་ཕྱིན་ཏེ། གསེར་གྱི་འགན་ཇི་ར་བླངས་ནས་དེ་ལ་བཙུགས། ལྷ་བཟོས་བྲིས་པ་བཞིན་དུ་བྱུང་པས། ཐམས་ཅད་ངོ་མཚར་དུ་གྱུར་ཏེ། བོད་དུ་ཡང་དཔལ་ལྡན་འབྲས་སྤུངས་ཀྱི་མཆོད་རྟེན་བཞེངས་པ་ལེགས་པའི་དཔེར་གྱུར་པར་གྲགས་སོ། །དེ་ལྟ་བུའི་རྟེན་བཟོ་གནས་ལེགས་ཤིང་བྱིན་རླབས་དང་ལྡན་པ་དེས། བུ་སློབ་མོས་གུས་ཅན་དགེ་བཤེས་མར་པའམ། དགེ་བཤེས་དྲེན་ལ་སོགས་པ་རྣམས་ཀྱིས་ཚོགས་བསོག་པའི་ཞིང་དུ་གྱུར་ཏེ། དེ་ལ་བརྟེན་ནས། རིན་པོ་ཆེའི་ཐུགས་ལྗགས་བཞུགས་པའི་གདུང་ཁང་ཡང་བསྒོམ་ཆེན་རས་པ་བཞིས་མཛད་
1-2-108b
དེ་བཞེངས་ནས་བཞུགས། གདན་ས་ལ་ཞེན་པ་ཆེ་ཞིང་སེམས་རྩེ་གཅིག་པར་བརྟན་པའི་དགེ་སློང་རོང་པ་ཁུ་མཚན་ལ་སོགས་པ་དང་། བསྒོམ་པ་རས་པ་ལ་སོགས་པའི་ཐུགས་རྩེ་གཅིག་པར་བསམ་གཏན་ལ་མཉམ་པར་འཇོག་ཅིང་བསྒྲུབ་པ་གཙོ་བོར་མཛད་པའི་བསྒོམ་ཆེན་སེང་གེ་ལྟ་བུ་རྣམས་འཚོགས་ནས་མོས་གུས་མཛད་ཅིང་བཞུགས་སོ། །དེ་བཞེངས་ནས་ལོ་ཉི་ཤུ་རྩ་གཅིག་ན། སེམས་ཅན་རྣམས་ཀྱི་དཔལ་མགོན་དུ་གྱུར་པ། མེ་ཉག་ཆོས་ཀྱི་རྒྱལ་པོའི་བླ་མཆོད་མཛད་པ་རྩང་སོ་བས། རྡོ་རྗེ་གདན་ལྟ་བུའི་གདན་ས་འདིར། སྐུ་གསུང་ཐུགས་ཀྱི་རྟེན་དང་། རིན་པོ་ཆེ་སྣ་ལྔ་དང་། དར་ཟབ་ལ་སོགས་པའི་ཡོ་བྱད་བསམ་གྱིས་མི་ཁྱབ་པས་ཡང་ཡང་བསྙེན་བཀུར། ཁྱད་པར་དཔལ་ལྡན་འབྲས་སྤུངས་ཀྱི་མཆོད་རྟེན་ལ་གསེར་གྱི་ན་བཟའ་བཟང་པོ་དང་། དེའི་ཆས་རྐྱེན་དང་། ལྷ་བཟོ་རྣམས་མེ་ཉག་འགའ་ནས་བརྫངས་ཏེ་བྱུང་པས། དེ་དག་གི་ཐུགས་དགོངས་རྫོགས་པར་བྱེད་པ་ལ། དགེ་བཤེས་ཤན་ཤེ་སྟོན་དགེ་དང་། བསྒོམ་པ་རྡོ་རྗེ་བྱང་ཆུབ་ཀྱིས་ཡོན་བདག་བྱས། བསྒོམ་པ་དཀོན་མཆོག་ཚུལ་ཁྲིམས་ཀྱི་བསམ་པ་བཟང་པོས་གཉེར་པ་མཛད། དེས་སྤྱིར་ཡང་བཟོ་གནས་མང་དུ་ཤེས་ཤིང་། ཁྱད་པར་དུ་མཆོད་རྟེན་འདི་བཞེངས་པ་ལ་མཁས་པ། རྗེ་རིན་པོ་ཆེའི་སྤྱན་སྔ་བ་གཞོན་ནུའི་མིང་ཅན་གྱིས་བཟོ་བྱས་ཏེ། མཆོད་རྟེན་ནང་
1-2-109a
༄༅། །གི་བཟོ་ཡང་ལེགས་སུ་བཅོས་ནས། འགའ་ནས་ཡར་འོངས་པའི་བཟོ་བོས་ཀྱང་གསེར་གྱི་ན་བཟའ་གསོལ། གདན་ས་ན་བཞུགས་པའི་བགྲེས་གཞོན་ཐམས་ཅད་ཀྱིས་དད་པ་དང་བརྩོན་འགྲུས་ཀྱིས་བསྐུལ་ཏེ། མཆོད་རྟེན་ལ་ནང་གཞལ་ཡས་ཁང་དུ་བྱས་པ་ལ་ཡངས་པ། སྒོ་བཞི་ལན་ཀན་དང་བཅས་པ། བང་རིམ་རྒྱལ་པོའི་ཁང་པ་དང་བཅས་པ། རྒྱར་འདོམ་བརྒྱད་པ་ལ་ཆུ་ཞིང་གབ་པའི་བཟོ་དང་རྩིག་པ་ཚར་ནས། ཞལ་ལའི་བཟོ་གནས་ལ་མཁས་པ། གཞོན་ནུ་ཤེས་རབ་ཅན་སྡེ་ཆེན་སོལ་ནག་ཐང་པོ་ཆེ་ནས་བོས་ཏེ། བཟོ་ལེགས་པའི་དཔེར་གྱུར་པ། རྒྱུ་དངུལ་ལས་བྱས་ཏེ། ཁ་དོག་ཀྱང་དེ་ལྟར་སྣང་བ་ལོ་གཉིས་ན་ཚར། དེའི་སྟེང་དུ་འབྱུང་བ་ཆར་གྱི་གཉེན་པོར། མཐིང་གི་གྱོ་མོ་བཟོ་བོ་མཁས་པ་ཚུལ་སྐྱབས་ཀྱིས་བགྱིས་ནས་མཆོད་རྟེན་དེའི་རྒྱབ་ཏུ་བཀབ། དེའི་རྩེ་མོར་གཅུང་པོ་དཔོན་ཇོ་སྲས་ཀྱིས། གསེར་གྱི་གཎྜི་ར་བལ་པོའི་བཟོ་བོ་ལ་ནོར་རྫས་མང་པོ་བརྫངས་ནས། ཤུལ་རིངས་ནས་སྤྱན་དྲངས་ཏེ། མཆོད་རྟེན་གྱི་དབུ་རྒྱུན་དུ་བཙུགས་པས་དགོན་གནས་འོད་དང་ལྡན་པར་བྱས་སོ། །དེར་གཞན་ཡང་མཁས་པའི་སྐྱེ་བོ་གང་གིས་གཟིགས་པ་དང་། སྐྱེ་བོ་ཐ་མལ་པ་གང་གིས་མཐོང་བ་རྣམས་ཀྱིས་བཟོ་དེ་ལེགས་སོ་ཞེས་ཉི་འོག་གི་རྒྱལ་ཁམས་ཐམས་ཅད་སྙན་པའི་བ་དན་གྱིས་ཁྱབ་པོ། །ཡ་གི་བལ་པོ་རྡོ་འབིགས་ནས། 
1-2-109b
མ་གི་མི་ཉག་འགའ་ཡན་ཆད་དུ་མཆོད་རྟེན་བཞེངས་པ་རྣམས་ཀྱི་དཔེ་ལེན་པའི་གནས་སུ་གྱུར་ཏེ། སངས་རྒྱས་ཀྱི་བསྟན་པ་ཇི་ལྟར་གནས་ཀྱི་བར་དུ། ཕྱོགས་མཚམས་ཐམས་ཅད་ཀྱི་བུ་སློབ་ཡོན་བདག་དང་བཅས་པ་རྣམས་ཀྱིས་བསྙེན་བཀུར་ཞིང་མཆོད་ནས། གསོལ་བ་བཏབ་ན་གནས་སྐབས་མཐར་ཐུག་ཐམས་ཅད་དུ་ཇི་ལྟར་བསམས་པའི་དོན་རྣམས་འགྲུབ་ཅིང་། དགོས་འདོད་ཕུན་སུམ་ཚོགས་པ་འབྱུང་བའི་ཡིད་བཞིན་གྱི་ནོར་བུ་རིན་པོ་ཆེ་ལྟ་བུའི་མཆོད་སྡོང་ཆེན་པོར་གྱུར་ཏོ། །ཨྠྀི། རྫོགས་སོ།། །།


目录
རྗེ་དུས་གསུམ་མཁྱེན་པའི་ཞལ་ཆེམས་བཞུགས་སོ། །